Huwag gumamit ng cell phone o PHS sa loob ng klinik o ospital. Sundin ang takdang oras tulad ng pagbisita sa ospital o pag-reserba ng kuwarto. Mahalaga din na humingi ng paliwanag mula sa duktor tungkol sa resulta ng pagpapa-eksamen o tungkol sa gamot hanggang malinaw ninyong naintindihan ang mga ito.

Kapag may alinlangan sa paggamit ng wika, humingi ng tulong mula sa isang interpreter o magsama ng tao bilang inyong interpreter. Depende sa lugar, may mga international association na nag-aalay ng serbisyo ng mga interpreter. Kung may mga social worker sa ospital, maaaring makipag-ugnayan din sa mga ito.

Sa sistema sa pagpapagamot sa Japan, marami ang hindi nag-aaplay upang tumanggap ng benepisyo kung kaya’t mahalaga na alamin ang sistema at ang pamamalakad nito. Magtanong sa reception o uketsuke o kung may mga social worker sa ospital, makipag-ugnayan sa mga ito. Walang bayad ang pakikipagkonsulta sa social worker at kanilang aalagaan ang inyong personal o pribadong impormasyon. Upang makatanggap ng pagpapagamot na walang problema, mahalaga na humingi ng tulong mula sa mga sanggunian o sa social worker kaya huwag mag-atubiling gamitin ang mga serbisyong ito.